Վարունգը ջերմասեր բույս է, սերմերը ծլում են 12-13C ջերմության պայմաններում: Բույսը լավ է աճում, երբ ջերմությունը հասնում է 26-28C-ի: Հողի ջերմաստիճանը 10C-ից ցածր լինելու դեպքում արմատային համակարգը չի աշխատում, բույսերը դեղնում են: Վարունգը ցրտահարվում է 0C-ից ցածր պայմաններում:
Արարատյան հարթավայրում վարունգի ցանքը կատարում են ապրիլի 25-ից մինչև մայիսի 15-ը, նախալեռնային շրջաններում` հունիսի 1-10-ը: Արարատյան հարթավայրում վարունգը ցանում են 2 անգամ` գարնանը և ամռանը` նախորդ մշակաբույսի բերքահավաքից հետո: 2-րդ ցանքը կատարում են հուլիսի 15-20-ը: Վարունգը մշակում են լավ լուսավորված, արևոտ, թեթև օրգանական նյութերով հարուստ հողերում: Վարունգը սիրում է օրգանական պարարտանյութեր:
Կարևոր նշանակություն ունի սերմերի նախացանքային մշակությունը: Բոլոր շրջաններում վարունգը պետք է մշակել ջրովի տարածություններում, թմբերի վրա` ակոսներով: Ցանքը կատարում են թմբի մեկ և երկու կողմերից:
Երկու կողմից ցանելիս թմբի լայնությունը վերցնում են 1,2մ, իսկ ակոսինը` 70 սմ, միջբույսային հեռավորությունը` 30սմ: Եթե ցանվում է թմբի 1 կողմից, թմբի լայնությունը պետք է լինի 0,8մ, ակոսինը` 40սմ: Մանրապտուղ սորտեր մշակելիս շարքը շարքից` 70սմ, բույսը բույսից 20-25սմ: Երկու կողմից մշակելիս թմբի լայնությունը 80սմ, ակոսինը` 70սմ: Միջբույսային տարածությունը` 20-25սմ: Վարունգի սերմերը ցանում են չոր, թրջած և ծլեցրած վիճակում: Նախընտրելի են վերջին երկուսը: Ցանքը կատարում են նախօրոք ջրած, քեշի եկած հողում և մինչև ծլելը չեն ջրում: Երբ ակոսները պատրաստ են և հողը ջրած, նույն օրը սերմերը դնում են ծլեցման: Սերմը լցնում են տոպրակի մեջ, 1-2 ժամ դնում հոսող ջրի տակ, ապա խոնավ ավազի կամ թեփի մեջ, որտեղ ջերմաստիճանը պետք է լինի 20C-25C-ից ոչ պակաս: Երկու օրից սերմերը ծլում են և պատրաստ են ցանքին: Ցանքը կատարվում է 3-4սմ խորությամբ, յուրաքանչյուր բնում գցում են 2-3 սերմ:
Սերմերը ծածկում են հողով, ջրել պետք չէ: Ջրել անհրաժեշտ է այն դեպքում, երբ ցանքը կատարում են չոր սերմերով: Ցանքի նորման 1հա-ի համար կազմում է շուրջ 3-4կգ: 3-4 օրից ծիլերը սկսում են երևալ: Չծլած բները վերացանում են ծլեցրած սերմերով, ապա կատարում` նոսրացում, բնում թողնելով 2 բույս: Ծլելուց մինչև 4-5 տերևների առաջանալը ջրել պետք չէ: Այնուհետև ջրում են և քեշի ժամանակ կատարում վերջին նոսրացումը` բնում թողնելով 1 բույս, ապա քաղհանում են, փխրեցնում և կատարում խոր բուկլից: Բուկլիցի հետ մեկտեղ կատարում են գլխավոր ցողունի ծերատում: Մինչև ծաղկելը և նույնիսկ մինչև առաջին պտուղների կազմակերպելը չեն ջրում, եթե ջրում են` շատ չափավոր: Պտղաբերության շրջանում 3-4 օրը մեկ ջրում են: Ջրումները պետք է կատարել հով ժամերին, դանդաղ, հավասար ջրով, թույլ չտալով լճացումներ կամ վարար հոսք: Ծիլը երևալուց 30-40 օր հետո վարունգը ծաղկում է, ընդ որում գլխավոր ցողունի վրա սկզբում ծաղկում են արական, իսկ 7-8 օրից` իգական ծաղիկները: Բույսերի սնուցումը զուգակցում են ջրումների հետ` 8-10 օրը մեկ անգամ: Կապված սորտից, վարունգի բերքահավաքը կատարում են ծլումից 40-60 օր հետո: Սովորական ցանքից 2-3 շաբաթ շուտ բերք ստանալու համար, վարունգը կարելի է մշակել ջերմատներում կամ ջերմոցներում աճեցրած թաղարային սածիլներով: Սա մեծ նշանակություն ունի նախալեռնային և լեռնային գոտիների համար: